Os Criterios de Avaliación

Velaquí vai unha pequena reflexión máis, neste caso acerca dun aspecto relacionado co desenvolvemento das clases, que tratamos coa profesora Ana Fontenla, na sesión do 18 de febreiro.

É unha cuestión que polo de agora non nos detivemos a comentar, pero que me parece moi relevante dende o punto de vista docente. Quero reflexionar nesta entrada sobre a avaliación e en como se trata este aspecto ao longo do curso.

Deixo de lado un motivo que pode suxerir outra entrada de reflexión que é o feito de que, polo xeral, en todas as materias durante a secundaria, a preparación das clases xiran en torno á superación dun fin deste tipo, sobre todo durante o curso de 2º de Bacharelato, debido á posterior selectividade. Idea coa que se pode estar máis ou menos de acordo, pero este é outro tema, co que non me vou a deter máis nesta entrada.

De feito, o que me gustaría resaltar dentro do mundo da avaliación, é o feito de que, polo xeral, na secundaria non se deixan claro cales son os criterios de avaliación que se van a seguir. En consecuencia, os rapaces carecen deste tipo de información, que persoalmente, me parece fundamental. No meu caso, eu tamén descoñecía cales eran as pautas a seguir, en ningún dos casos os profesores nos especificaron como íamos ser avaliados e, como vas facer un pastel, se non sabes os ingredientes nin os pasos a seguir?. Quero dicir, se non sabes como vas ser avaliado, non podes planificar o teu estudio nin as túas tarefas en base a isto.

Polo tanto, penso que é un factor importante informar aos alumnos desde o principio do curso sobre estes datos, tanto porque así eles teñen idea de que percorrido deben de facer, como porque así, como docente, tes un punto máis desde o cal os podes motivar.

Un saúdo,